اسرائیل کے حیفا شہر میں حزب اللہ کے ڈرون حملوں میں 4 اسرائیلی فوجی ہلاک اور 67 زخمی

فوٹو : فائل الجزیرہ

بیروت: اسرائیلی جارحیت کے جواب میں
حزب اللّٰہ کی جانب سے جوابی کاروائیاں جاری ہیں اور تازہ حملہ کیا گیا ہے، اسرائیل کے حیفا شہر میں حزب اللہ کے ڈرون حملوں میں 4 اسرائیلی فوجی ہلاک اور 67 زخمی ہوگئے ہیں۔

اس حوالے سے اسرائیلی میڈیا کے مطابق شمالی اسرائیل میں بن یامین کے علاقے میں دھماکے ہوئے ہیں، جس میں کم ازکم 67 افراد زخمی ہوگئے ہیں۔

دھماکوں کے مقام پر ریسکیو آپریشن شروع کیا گیا، جس میں ایمبولینسز کے ساتھ ساتھ ہیلی کاپٹر بھی پہنچے، جبکہ زخمیوں کو مختلف اسپتالوں میں منتقل کردیا گیا ہے۔

رپورٹس کے مطابق زخمیوں میں 5 کی حالت تشویشناک ہے، اسپتالوں میں ایمرجنسی نافذ کردی گئی ہے۔

دوسری جانب حزب اللّٰہ نے بھی اسرائیلی شہر میں ڈرون حملے کرنے کی تصدیق کردی ہے۔ حزب اللّٰہ کا کہنا ہے کہ مقبوضہ گولان پہاڑیوں پر بھی اسرئیلی فوجی اڈے پر میزائل حملہ کیا گیا ہے۔

اسرائیلی فوج کی جارحیت جاری، شمالی غزہ پر 9 دن سے جاری محاصرے میں کم از کم 300 افراد جاں بحق ہو چکے ہیں جبکہ زمینی حملے اور ڈرون حملوں کی وجہ سے ہزاروں فلسطینی محصور ہیں اور کھانے پینے کی اشیاء کی شدید قلت کا سامنا کر رہے ہیں۔

واضح رہے کہ غزہ میں 7 اکتوبر 2023 سے اسرائیلی حملوں کے نتیجے میں کم از کم 42 ہزار 227 افراد شہید اور 98 ہزار 464 افراد زخمی ہو چکے ہیں۔

اسرائیل میں7 اکتوبر 2023 کو حماس کے حملے میں 1,139 افراد ہلاک ہوئے تھے جبکہ 200 سے زائد اسرائیلیوں کو یرغمال بنا لیا گیا تھا.