احتجاج کے دوران زخمی ہونے والا اسلام آباد پولیس کا کانسٹیبل جاں بحق

فوٹو: سوشل میڈیا

اسلام آباد: گزشتہ روز تحریک انصاف کے احتجاج کے دوران زخمی ہونے والا اسلام آباد پولیس کا کانسٹیبل جاں بحق ہوگیا، عبدالحمید شاہ زخموں کی تاب نہ لا سکا۔

اس حوالے سے ترجمان اسلام آباد پولیس کے مطابق شرپسند عناصر پولیس کنسٹیبل عبدالحمید شاہ کو اغوا کے بعد تشدد کرتے رہے، کانسٹیبل اسپتال میں زخموں کی تاب نہ لاتے ہوئے جاں بحق ہوگئے۔

جاں بحق ہونے والا عبدالحمید انوسٹی گیشن ونگ میں تعینات تھے جبکہ لاء اینڈ آرڈر ڈیوٹی پر 26 نمبر چونگی پر موجود تھے۔

عبدالحمید ایبٹ آباد کے رہائشی تھے اور وہ اسلام آباد پولیس میں 1988 میں بھرتی ہوئے۔ عبدالحمید نے 3 ماہ بعد پولیس سے سروس مکمل کرکے ریٹائر ہونا تھا۔

وزیراعظم نے واقعے کی شدید الفاظ میں مذمت کرتے ہوئے جاں بحق اہلکار کے اہل خانہ سے اظہار تعزیت کی اور ہدایت کی ہ واقعے میں ملوث تمام افراد کو کیفر کردار تک پہنچایا جائے۔

وزیراعظم نے کہا کہ پی ٹی آئی نے ہمیشہ احتجاج کی آڑ میں تشدد کا راستہ اپنایا، اسی سیاسی جماعت نے ماضی میں سرکاری ٹی وی کی عمارت پر حملہ کیا اور پارلیمنٹ ہاؤس کا گیٹ توڑا۔