اداکار فیصل قریشی کی والدہ و سینیئر اداکارہ افشاں قریشی بیٹے کو اچھا انسان نہیں مانتی

فوٹو: فائل

کراچی: پاکستان کے معروف اداکار فیصل قریشی کی والدہ و سینیئر اداکارہ افشاں قریشی بیٹے کو اچھا انسان نہیں مانتی اور ناراض ہیں کھل کر اپنی ناراضگی کا اظہار کردیا۔

سینیئر اداکارہ افشاں قریشی نے اپنے حالیہ انٹرویو میں کہا کہ میرا بیٹا فیصل قریشی اسٹار بن گیا ہے، میرے بیٹے کو عالمی سطح پر شہرت ملی ہے اور آج وہ جس مقام پر ہے پاکستان میں دوسرا کوئی اداکار اس مقام پر نہیں۔

افشاں قریشی نے کہا کہ میں ہمیشہ سے ہی اپنے بیٹے کو بڑا اسٹار دیکھنا چاہتی تھی، فیصل قریشی کے بچپن میں خالد بٹ صاحب عُمرے کی سعادت حاصل کرنے جارہے تھے تو میں نے اُنہیں اپنے بیٹے کے لیے دُعا لکھ کر دی تھی۔

انھوں نے بتایا کہ کہ اللہ تعالیٰ میرے بیٹے فیصل قریشی کو اتنا عروج دینا جتنا امیتابھ بچن کو ملا ہے اور جس طرح پوری دنیا امیتابھ کو پہچانتی ہے بالکل ویسے ہی میرے بیٹے کو بھی پہچانے۔

افشاں قریشی نے کہا کہ اللہ تعالیٰ سے یہی دُعا تھی کہ فیصل بڑا اسٹار بن جائے لیکن میں نے اپنی دُعاؤں میں ایک غلطی کردی، وہ یہ کہ میں نے کبھی یہ دُعا نہیں کی کہ اللہ تعالیٰ فیصل کو ایک بہت اچھا بیٹا اور اچھا انسان بھی بنائے۔

اُنہوں نے کہا کہ میں سب کے بیٹوں کو یہی پیغام دینا چاہتی ہوں کہ اپنے ماں باپ کی عزت کرو، اُن کی خدمت کرو کیونکہ ماں باپ کے ساتھ اچھا سلوک کروگے تو آپ کو جنت ملے گی۔

 یہ بتاتے ہوئے انھوں نے کہا اگر آپ اپنے والدین کو ٹھکرا دو گے تو اللہ تعالیٰ بھی آپ کو ٹھکرا دے گا۔