یوٹیوبر رجب بٹ اور ندیم نانی کی اسلام آباد ہائی کورٹ سے ضمانت منظور کرلی

فوٹو : فائل

اسلام آباد: اسلام آباد ہائیکورٹ نے جوا ایپ کی تشہیر سے متعلق کیس میں معروف یوٹیوبرز رجب بٹ اور ندیم نانی والا کو وطن واپسی کے بعد 10 دن کی راہداری ضمانت دیتے ہوئے متعلقہ حکام کو دونوں کو گرفتار نہ کرنے کا حکم جاری کیا ہے۔ عدالت نے واضح کیا کہ یہ عبوری ریلیف اس شرط پر دیا گیا ہے کہ دونوں افراد مقررہ مدت میں متعلقہ عدالت سے رجوع کریں۔

اسلام آباد ہائیکورٹ کے جسٹس انعام امین منہاس نے درخواست گزاروں کے وکیل احد کھوکھر کے دلائل سننے کے بعد یہ حکم جاری کیا۔ وکیل نے مؤقف اختیار کیا کہ ان کے موکل برطانیہ سے ملک بدری کے بعد اپنی قانونی ذمہ داریوں کا سامنا کرنے کے لیے پاکستان واپس آئے ہیں، لہٰذا ان کی گرفتاری نہ کی جائے۔

دونوں یوٹیوبرز اس وقت ملک واپس پہنچے جب برطانوی حکام کی جانب سے اُن کی ملک بدری کی خبر سامنے آئی۔ رجب بٹ اور ندیم نانی والا برٹش ایئرویز کی پرواز BA-2161 کے ذریعے اسلام آباد انٹرنیشنل ایئرپورٹ پہنچے، جہاں مداحوں اور مختلف سوشل میڈیا انفلوئنسرز نے ان کا بھرپور استقبال کیا۔ واپسی کے دوران انہوں نے جہاز میں بنائی گئی تصاویر اور ویڈیوز سوشل میڈیا پر شیئر کیں، جنہیں چند ہی گھنٹوں میں ہزاروں بار دیکھا گیا۔

اسلام آباد ایئرپورٹ پر اترنے کے بعد دونوں افراد کا امیگریشن کا عمل مکمل کیا گیا، جس کے بعد وہ اپنے گھروں کی طرف روانہ ہوگئے۔ عدالت نے گزشتہ روز ان کی درخواست پر 10 روزہ راہداری ضمانت منظور کرتے ہوئے کہا کہ وہ اس دوران اپنے خلاف قائم گیمبلنگ ایپ اور سائبر کرائم سے متعلق مقدمات کے سلسلے میں متعلقہ عدالتوں میں پیش ہوں۔

درخواست گزاروں کے وکیل احد کھوکھر نے عدالت کو بتایا کہ ان کے موکل اپنے تمام قانونی معاملات کا سامنا کرنے کے لیے تیار ہیں۔ ان کا کہنا تھا، “ہم اپنے قانونی معاملات کا سامنا کرنا چاہتے ہیں، اور ہمیں عدالت سے انصاف کی توقع ہے۔”

برطانوی ہوم ڈیپارٹمنٹ نے رجب بٹ کا ویزہ 2027 تک منسوخ کرتے ہوئے انہیں ملک چھوڑنے کا حکم دیا تھا۔ ابتدائی الزامات میں دہشت گردی اور شرپسند سرگرمیوں کا ذکر تھا، تاہم تحقیقات میں یہ الزامات بے بنیاد ثابت ہوگئے۔ حکام کے مطابق ویزا منسوخی کی اصل وجہ درخواست میں فراہم کی گئی "نامکمل اور غلط معلومات” تھیں، جو قواعد کی خلاف ورزی کے زمرے میں آتی ہیں۔

پاکستان پہنچنے کے بعد رجب بٹ نے برطانوی ہوم ڈیپارٹمنٹ کے اقدام کو "غیر منصفانہ” قرار دیتے ہوئے اعلان کیا کہ وہ اس فیصلے کے خلاف اپیل دائر کریں گے۔ ان کا کہنا تھا، "ہم نے کسی قانون کی خلاف ورزی نہیں کی، اور ویزے کی منسوخی کو ہم جانبدارانہ کارروائی سمجھتے ہیں۔”

رجب بٹ اور ندیم نانی والا کی ملک بدری اور پاکستان واپسی پر سوشل میڈیا پر شدید ردعمل دیکھنے میں آیا۔ متعدد صارفین نے اس اقدام کو ”قانون کی جیت“ قرار دیا، جبکہ کئی افراد نے یوٹیوبرز کے ساتھ پیش آنے والے واقعے پر افسوس کا اظہار کیا۔ اسلام آباد ایئرپورٹ پر موجود مداحوں کا کہنا تھا کہ وہ امید رکھتے ہیں کہ یہ دونوں شخصیات اپنے قانونی معاملات کو جلد حل کرکے دوبارہ اپنی سرگرمیاں جاری رکھ سکیں گی۔

واضح رہے رجب بٹ آج اسلام آباد ہائی کورٹ میں پیش ہوئے اس موقع پر ان کی گاڑی عدالت کے اندر چلی گئی واپسی پر میڈیا کے نمائندوں نے سوال کیا کہ آپ کی گاڑی اندر چلی گئی تو رجب بٹ نے کہا یہ گاڑی میری نہیں ہے، سفید رنگ کی جس گاڑی پر وہ عدالت کے احاطہ میں اندر گئے میڈیا رپورٹ کے مطابق اس پر کوئی نمبر بھی نہیں لگا تھا۔

یوٹیوبر رجب بٹ اور ندیم نانی کی اسلام آباد ہائی کورٹ سے ضمانت منظور کرلی