گزشتہ 2 سال میں ڈاکٹرز، انجینیئرز سمیت 14 لاکھ 89 ہزار افراد ملک چھوڑ گئے

فوٹو : فائل 

اسلام آباد : پاکستان سے گزشتہ 2 سال میں ڈاکٹرز، انجینیئرز سمیت 14 لاکھ 89 ہزار افراد ملک چھوڑ گئے بیرون ملک جانے والوں کا ڈیٹا بیورو آف امیگریشن کی طرف سے جاری کیا گیا ہے، صرف سال 2025ء میں لاکھوں پاکستانی ملک میں روزگار نہ ملنے اور دیگر مسائل کے باعث ملک چھوڑ کر بیرون ملک منتقل ہوئے۔

 اس حوالے سے روزنامہ جنگ نے ایک دستاویز کا حوالہ دے کر ایک رپورٹ میں بتایا ہے کہ سال 2025ء میں 7 لاکھ 62 ہزار 499 پاکستانی بیرون ملک ملازمت کے لیے گئے جبکہ سال 2024 میں7 لاکھ 27 ہزار381 پاکستانی بیرون ملک گئے تھے۔

 رپورٹ میں بتایا گیا ہے کہ بیورو آف امیگریشن کی دستاویز کے مطابق سال 2025ء میں5 ہزار 659 اکاؤنٹنٹ اور 10 ہزار 503 باورچی پاکستان سے باہر گئے۔

دستاویز کے مطابق 3 ہزار 795 ڈاکٹر، 5 ہزار 946 انجینئرز، 1 ہزار 640 نرسز اور 1 ہزار 725 اساتذہ بیرون ملک ملازمت کے لیے چلے گئے۔

بیورو کی دستاویز کے مطابق 2025ء میں 1 لاکھ 63 ہزار 718 ڈرائیور، 6 ہزار 475 الیکٹریشنز، 4 لاکھ 65 ہزار 138 مزدور اور 5 ہزار 700 مستری بیرون ملک گئے ہیں۔

دستاویز کے مطابق 12 ہزار 703 ٹیکنیشنز، 11 ہزار 777 منیجرز، 2 ہزار 306 پلمبر، 2 ہزار 27 ویٹرز، 18 ہزار 352 اعلی تعلیم یافتہ، 13 ہزار 657 انتہائی ہنر مند، 2 لاکھ 22 ہزار171 ہنر مند افراد، 42 ہزار 257 نیم ہنر مند، 4 لاکھ 66 ہزار62 غیر ہنر مند افراد بیرون ملک گئے۔

بیورو کی دستاویز کے مطابق 5 لاکھ 30 ہزار 256 پاکستانی سعودی عرب، 52 ہزار 664 افراد یو اے ای، 68 ہزار 376 پاکستانی قطر، 37 ہزار 726 بحرین، 6 ہزار 590 کویت، 39 جنوبی کوریا،1 ہزار 5 امریکا اور 4 ہزار 355 پاکستانی ملازمت کے لیے برطانیہ گئے۔

رپورٹ کے مطابق 984 افراد جرمنی، 813 اٹلی، 2 ہزار 230 چین، 2 ہزار 210 جاپان اور 1 ہزار 109 پاکستانی ملازمت کےلیے رومانیہ گئے.