حکومت اور اپوزیشن کے رہنماؤں کے درمیان ان ڈائریکٹ رابطہ ہوگیا

فوٹو : فائل

اسلام آباد : حکومت اور اپوزیشن کے رہنماؤں کے درمیان ان ڈائریکٹ رابطہ ہوگیا، اس حوالے سے اے آر وائی نیوز کی رپورٹ میں دعویٰ کیا گیا ہے کہ پی ٹی آئی ذرائع کا کہنا ہے کہ حکومتی مشاورت سے لگتا ہے کہ وہ مذاکرات میں سنجیدہ ہے۔

رپورٹ کے مطابق حکومت اور اپوزیشن کے درمیان مذاکرات کے حوالے سے ان ڈائریکٹ رابطہ بڑی پیش رفت ہے تاہم تاحال حکومت اور اپوزیشن کے رہنماؤں کی جانب سے کوئی تصدیق سامنے نہیں آئی۔

رپورٹ میں ذرائع کا حوالہ دے کر بتایا ہے کہ بانی پی ٹی آئی کی جانب سے قومی اسمبلی کے نامزد اپوزیشن لیڈر اور تحفظ آئین پاکستان تحریک کے سربراہ محمود خان اچکزئی کو مشترکہ دوست کے ذریعہ وفاقی وزیر کا پیغام پہنچایا گیا۔

محمود خان اچکزئی کو پیغام دیا گیا ہے کہ حکومت مذاکرات پر اپنے اتحادیوں سے مشاورت کر رہی ہے۔ یہ مشاورت مکمل ہوتے ہی اپوزیشن سے باقاعدہ مذاکرات کے لیے رابطہ ہوگا۔

حکومتی ذرائع نے یہ بھی بتایا کہ اسپیکر قومی اسمبلی کا اپوزیشن لیڈر کے نوٹیفکیشن کے لیے محمود خان اچکزئی سے رابطہ ہے اور سینئر سیاستدان کی جانب سے آج اسپیکر کو مطلوبہ دستاویزات فراہم کر دی جائیں گی۔

بتایا گیا ہے کہ محمود اچکزئی کو اپوزیشن لیڈر کا مقرر کیے جانے کا نوٹیفکیشن متوقع ہے، رپورٹ کے برعکس اپوزیشن اتحاد یا پی ٹی آئی کا نوٹیفکیشن سے بڑا معاملہ عمران خان سے ملاقاتیں بحال کرانا اور عدالتوں سے مبینہ دباؤ ختم کرنا ہے.