سرکاری حج 10 لاکھ 75 ہزار روپے میں ہوگا، حج پالیسی 2024 کا اعلان

فائل:فوٹو

اسلام آباد:نگراں وزیر مذہبی امور انیق احمد نے حج پالیسی 2024 کا اعلان کردیا۔۔ 2024 میں سرکاری حج 10 لاکھ 75 ہزار روپے میں ہوگا۔۔ وزیرمذہبی امور نے کہا حج 2024 ڈیجیٹائز ہوگا ہر حاجی کو ایک ایپ دیں گے۔۔ ہم تمام حجاج خواتین کو عبایا دیں گے جس کے پیچھے پاکستانی پرچم ہوگا۔ حج درخواستوں کی وصولی کا آغاز 27 نومبر سے ہوگا جبکہ آخری تاریخ 12 دسمبر ہوگی۔

اسلام آبادمیں پریس کانفرنس کرتے ہوئے نگراں وزیر مذہبی امور نے کہا کہ پاکستان کی تاریخ میں کبھی ایسا نہیں ہوا کہ کبھی حج گزشتہ کی نسبت سستا ہو، گزشتہ سال حج 11 لاکھ 75 ہزار کا ہوا تھا اور اب ہم اس پیکج کو 10 لاکھ 75 ہزار تک لے آئے ہیں، ہم نے ایک لاکھ روپے بغیر کسی سمجھوتے کے کم کر دیا ہے۔۔

وزیرمذہبی امور انیق احمد نے کہا کہ حج کے تمام انتظامات مکمل کر لیے گئے ہیں، ہم نے ٹرانسپورٹ اور ہوٹلز کا بھی معائنہ کرلیا، حج 2024 ڈیجیٹائز ہوگا ہر حاجی کو ایک ایپ دیں گے، اس ایپ کے ذریعے حاجی گم ہو ہی نہیں سکتا، ہر حاجی کو سم میں 7 جی بی ڈیٹا دیا جائے گا اور 40 روز تک حاجی ایسا ہی موبائل استعمال کرے۔۔

وزیر مذہبی امور انیق احمد نے کہا ہم تمام حجاج خواتین کو عبایا دیں گے جس کے پیچھے پاکستانی پرچم ہوگا۔ مدینے میں عموما 8 روز قیام ہوتا ہے اگر کوئی حاجی 4 روز رہنا چاہے تو ہم کریں گے اس سے پیکیج مذید سستا ہو جائے گا۔۔روڈ ٹو مکہ سعودی حکومت نے ہمیں فیسیلیٹی دے رکھی ہے ہم نے اس میں کراچی شامل کرلیا ہے۔۔

سال 2024 میں پاکستان کا حج کوٹہ ایک لاکھ 79 ہزار 210 کا ہوگا۔ حج درخواستوں کی وصولی کا آغاز 27 نومبر سے ہوگا جبکہ آخری تاریخ 12 دسمبر ہوگی۔