کوہلی اور دھونی یوراج کے دوست نہیں تھے،یوگراج سنگھ کا تہلکہ خیز دعویٰ

فوٹو : فائل 

اسلام آباد :بھارت کے سابق آل راؤنڈر یوراج سنگھ کے والد یوگراج سنگھ نے ایک چونکا دینے والا دعویٰ کیا ہے۔ ان کے مطابق ویرات کوہلی اور مہندر سنگھ دھونی نے کبھی یوراج کو اپنا دوست نہیں سمجھا بلکہ دونوں کو یہ خوف رہا کہ کہیں یوراج ان کی کپتانی کی کرسی کے لیے خطرہ نہ بن جائے۔

ایک انٹرویو میں یوگراج سے سوال کیا گیا کہ جب دھونی کے بعد ویرات بھارتی ٹیم کے کپتان بنے تو کیا وہ یوراج کو مزید مواقع دے سکتے تھے؟ اس پر یوگراج نے دو ٹوک الفاظ میں کہا:
"اس دنیا میں جہاں کامیابی، دولت اور شہرت ہو، وہاں کوئی دوست نہیں ہوتا۔ لوگ بس موقع ملنے پر پیٹھ میں چھرا گھونپتے ہیں۔”

یوگراج نے الزام لگایا کہ بڑے کھلاڑی ہمیشہ یوراج سنگھ کے ٹیلنٹ سے خائف رہے۔ ان کے مطابق:"یوراج خدا کی طرف سے بنایا گیا ایک عظیم کھلاڑی تھا۔

دھونی سے لے کر کوہلی تک سب ڈرتے تھے کہ کہیں وہ ان کی جگہ نہ لے لے۔ مگر کسی کو یہ اندازہ نہیں تھا کہ اتنا بڑا کھلاڑی دراصل ایک بڑے دل کا انسان بھی ہے جو دوسروں کی کامیابی پر خوش ہوتا ہے۔”

انہوں نے مزید کہا کہ انہوں نے ہمیشہ بیٹے کو نصیحت کی کہ دوست کو پہچانو۔"میں نے یوراج سے کہا کہ اگر اس دنیا میں کوئی تمہارا سچا دوست ہے تو وہ صرف سچن ٹنڈولکر ہے۔

سچن سب کو بھائی کی طرح چاہتے تھے، سب کے بھلے کی سوچتے تھے، اسی لیے انہیں کرکٹ کا بھگوان کہا جاتا ہے۔”

بیک گراؤنڈ

یوراج سنگھ بھارت کے ان عظیم آل راؤنڈرز میں شمار ہوتے ہیں جنہوں نے اپنی جارحانہ بیٹنگ اور کارکردگی سے ٹیم کو کئی بڑے ٹورنامنٹس جتوائے۔

• 2000 سے 2017 کے دوران انہوں نے 402 بین الاقوامی میچز کھیلے۔

• اس دوران یوراج نے 11178 رنز اسکور کیے، جن میں 17 سنچریاں اور 71 نصف سنچریاں شامل ہیں۔

• گیند بازی میں بھی وہ شاندار رہے اور تینوں فارمیٹس میں مجموعی طور پر 148 وکٹیں حاصل کیں۔

• وہ ورلڈ کپ 2011 کے ہیرو قرار دیے گئے، جہاں ان کی آل راؤنڈ پرفارمنس نے بھارت کو عالمی چیمپئن بنایا۔

یوراج اور دھونی کے تعلقات ہمیشہ موضوع بحث رہے۔ ورلڈ کپ 2011 میں دھونی کی کپتانی میں یوراج نے شاندار کارکردگی دکھائی، مگر بعد کے برسوں میں دھونی پر یہ الزامات لگتے رہے کہ انہوں نے یوراج سمیت کئی سینئر کھلاڑیوں کو ٹیم سے باہر کرنے میں کردار ادا کیا۔ ویرات کوہلی کے دور میں بھی یوراج کو زیادہ موقع نہ ملنے پر سوال اٹھے۔

کوہلی اور دھونی یوراج کے دوست نہیں تھے،یوگراج سنگھ کا تہلکہ خیز دعویٰ