وزیراعظم شہباز شریف اور فیلڈ مارشل عاصم منیر کا خیبر پختونخوا کے سیلاب متاثرہ علاقوں کا دورہ

 فوٹو : اسکرین شاٹ 

پشاور: وزیراعظم شہباز شریف اور فیلڈ مارشل عاصم منیر نے خیبر پختونخوا کے سیلاب متاثرہ علاقوں کا دورہ کیا۔

میڈیا کے مطابق دونوں رہنما سب سے پہلے سوات پہنچے جہاں وفاقی وزیر امیر مقام نے استقبال کیا۔ اس موقع پر وفاقی وزراء عطا تارڑ، امیر مقام اور احسن اقبال بھی وزیراعظم کے ہمراہ تھے۔

بعد ازاں وزیراعظم اور فیلڈ مارشل نے بونیر، شانگلہ اور صوابی کا بھی دورہ کیا اور انہیں صوبے میں جاری ریسکیو اور ریلیف آپریشنز پر تفصیلی بریفنگ دی گئی۔

وزیراعظم ہاؤس کے اعلامیہ کے مطابق شہباز شریف نے متاثرین سے اظہار یکجہتی کیا اور ہر ممکن امداد فراہم کرنے کی یقین دہانی کرائی۔ دورے کے دوران وزیراعظم اور شرکاء نے جاں بحق افراد کے لیے فاتحہ خوانی بھی کی۔

وزیراعظم نے کہا کہ وفاقی حکومت اور پاک فوج متاثرین کی بحالی کے لیے تمام وسائل بروئے کار لائیں گے۔ انہوں نے غیر قانونی قبضوں، ٹمبر مافیا اور کان کنی کی خلاف ورزیوں کو تباہی کی بڑی وجہ قرار دیتے ہوئے ہدایت کی کہ خلاف ورزی کرنے والوں کے خلاف فوری اور بلا امتیاز کارروائی کی جائے۔

شہباز شریف نے کہا کہ پاکستان کو ایک ایسی سخت ریاست بننا ہوگا جہاں قانون سب پر یکساں لاگو ہو اور کسی کو استثنیٰ نہ دیا جائے۔

اس موقع پر آرمی چیف اور فیلڈ مارشل عاصم منیر نے بھی سیلاب متاثرہ علاقوں میں تعینات افواج، پولیس اور سول انتظامیہ سے ملاقات کی اور ان کی بے لوث خدمات کو سراہا۔

انہوں نے کہا کہ سیلاب متاثرین کی مدد اولین ترجیح ہے اور اس حوالے سے کوئی کسر نہ چھوڑی جائے۔ ریسکیو اور ریلیف آپریشنز کو انتہائی جذبے اور محنت کے ساتھ جاری رکھا جائے تاکہ متاثرہ خاندانوں کی مشکلات کم کی جا سکیں۔

حکام کے مطابق حالیہ بارشوں اور سیلاب کے باعث خیبر پختونخوا میں اب تک 350 سے زائد افراد جاں بحق ہو چکے ہیں جن میں صرف بونیر کے 228 افراد شامل ہیں۔

وزیراعظم شہباز شریف اور فیلڈ مارشل عاصم منیر کا خیبر پختونخوا کے سیلاب متاثرہ علاقوں کا دورہ