بلوچستان میں دہشتگردوں کے حملے،14 سکیورٹی اہلکار شہید،جوابی کارروائی میں21 دہشتگرد ہلاک

فوٹو: فائل

راولپنڈی: بلوچستان میں دہشتگردوں کے حملے،14 سکیورٹی اہلکار شہید،جوابی کارروائی میں21 دہشتگرد ہلاک ہوگئے،بلوچستان میں مختلف علاقوں میں دہشتگردوں کی جانب سے بزدلانہ حملے کیے گئے۔

آئی ایس پی آرکے مطابق گزشتہ رات بلوچستان کے مختلف علاقوں میں دہشتگردوں کی جانب سے بزدلانہ حملے کیے گئے، حملوں کا مقصد بلوچستان میں امن و امان کی صورتحال خراب کرنا تھا۔

ترجمان پاک فوج نے بتایا کہ سیکیورٹی فورسز کی موثر اور بروقت کارروائی میں 21 دہشتگرد ہلاک ہوئے، آپریشن کے دوران پاک فوج کے 10 جوان اور قانون نافذ کرنے والے اداروں کے 4 اہلکار بھی شہید ہوئے۔

اس کے علاوہ بلوچستان کے ضلع قلات کے مختلف مقامات پر سیکیورٹی فورسز اور مسلح افراد کے درمیان شدید جھڑپوں کے نتیجے میں ایک سب انسپکٹر اور 4 لیویز اہلکار جاں بحق ہوگئے۔

سول ہسپتال قلات کے عہدیدار نے بتایا کہ 11 لاشیں اور 6 زخمیوں کو قلات سول ہسپتال منتقل کیا گیا ہے،ان کا کہنا تھا کہ قلات میں مختلف مقامات پر رات گئے جھڑپوں میں ایک سب انسپکٹر اور 4 لیویز اہلکار سمیت 11 افراد جاں بحق ہوئے ہیں۔

نجی ٹی وی ڈان نیوز کے مطابق مسلح افراد نے ہوٹل اور گھر پر حملہ کیا تھا، جس کے نتیجے میں ایک قبائلی اور ہوٹل پر موجود دیگر 2 شہری بھی جاں بحق ہوگئے، ملزمان نے قبائلی شہری کے ہوٹل کو بھی نقصان پہنچایا۔

اس سے پہلے لیویز کنٹرول روم کے مطابق قلات میں رات گئے مہلبی کے مقام پر سیکیورٹی فورسز اور حملہ آوروں کے درمیان شدید جھڑپیں ہوئیں۔

لیویز کنٹرول روم کے مطابق قلات فائرنگ میں قبائلی رہنما بھی جاں بحق ہوئے جبکہ قلات فائرنگ سے ہوٹل پر 2 شہری بھی جاں بحق ہوئے۔

لیویز کنٹرول روم کے مطابق اسسٹنٹ کمشنر سمیت 5 لیویز اہلکار زخمی ہوئے ہیں جنہیں علاج کے لیے خضدار اور کوئٹہ منتقل کر دیا گیا ہے۔

یاد رہے کہ رات گئے بلوچستان کے ضلع موسٰی خیل کے علاقے راڑہ شم کے مقام پر ٹرکوں اور مسافر بسوں سے اتارکر شناخت کے بعد 23 افراد کو فائرنگ کرکے قتل کر دیا تھا۔

اسسٹنٹ کمشنر نجیب کاکڑ نے بتایا کہ مسلح افراد نے 10 گاڑیوں کو بھی نذر آتش کر دیا۔بتایا گیا ہے کہ پولیس اور لیویز نے موقع پر پہنچ کر لاشوں کو ہسپتال منتقل کرنےکا سلسلہ شروع کر دیا، جاں بحق افراد کا تعلق پنجاب سے ہے۔