چند اعلیٰ فوجی افسران کی گرفتاری پاکستان کا اندرونی معاملہ ہے،امریکا

فائل:فوٹو
واشنگٹن: امریکا نے واضح کیاہے کہ پاکستان اور امریکا بیشتر معاملات میں مل کر کام کرنے کے خواہش مند ہیں اور اس کے لیے تیار بھی ہیں۔ چند اعلیٰ فوجی افسران کی گرفتاری پاکستان کا اندرونی معاملہ ہے۔

امریکی محکمہ دفاع پینٹاگون کی ڈپٹی پریس سیکرٹری سبرینا سنگھ نے نیوز بریفنگ میں کہا ہے کہ امریکا کسی بھی ملک کے اندرونی معاملات کے حوالے سے غیر جانبداری کے اصولوں پر عمل پیرا ہے۔

سبرینا سنگھ کا کہنا تھا کہ امریکا اور پاکستان کی اسٹریٹجک اور دیگر بہت سے امور میں مضبوط شراکت داری ہے، دونوں ملکوں نے بین الاقوامی فورمز میں ساتھ کام کیا ہے۔

پینٹاگون کی ڈپٹی پریس سیکرٹری کا کہنا تھا کہ پاکستان اور امریکا بیشتر معاملات میں مل کر کام کرنے کے خواہش مند ہیں اور اس کے لیے تیار بھی ہیں۔

امریکی محکمہ دفاع کی ڈپٹی پریس سیکرٹری نے مزید کہا کہ دونوں ملک کے تعلقات خوش گوار رہے ہیں اور اس وقت بیشتر بین الاقوامی معاملات میں فکر و نظر کی ہم آہنگی پائی جاتی ہے، دونوں ممالک مختلف شعبوں میں تعاون کی گنجائش پیدا کرنے کے لیے کوشاں ہیں۔