پاکستان نے سری لنکا کو 6 وکٹوں سے ہرا کر ٹی ٹوئنٹی ٹرائی سیریز جیت لی

فوٹو : کرک انفو

راولپنڈی : پاکستان نے سری لنکا کو 6 وکٹوں سے ہرا کر ٹی ٹوئنٹی ٹرائی سیریز جیت لی، فائنل میں سری لنکا کی ٹیم بالکل آف کلر دکھائی دی، 98 رنز پر 2 کھلاڑی آوٹ تھے لیکن 114 پر پوری ٹیم پویلین لوٹ گئی.

راولپنڈی اسٹیڈیم میں کھیلے گئے فائنل میچ میں سری لنکا نے پاکستان کو جیت کیلئے 115 رنز کا ہدف دیا، جو اس نے 8 گیندوں پہلے حاصل کرلیا،بابراعظم 37 رنز بنا کر ناٹ آوٹ رہے۔

پاکستان نے ہدف کے تعاقب میں اچھا آغاز کیاصاحبزادہ فرحان اور صائم ایوٹ نے7 اعشاریہ 3 اووز میں 46 رنز کی شراکت داری قائم کی، صاحبزادہ فرحان 23 رنز بنا کر آوٹ ہو گئے، ان کی اننگز میں ایک چھکا اور 2 چوکے شامل تھے۔انہیں ایشا ملنگا نے آؤ ٹ کیا۔

صائم ایوب نے 6 چوکوں کی مدد سے 36رنز بنائے، وہ ہسارانگا کی گیند پر ایل بی ڈبلیو ہوئے،کپتان سلمان آغا لمبی اننگز نہ کھیل سکے اور 14 گیندوں پر اتنے ہی رنز بناکر پولین لوٹ گئے۔ان کی وکٹ رتنائیکے کے حصے میں آئی۔

فخر زمان صرف 3 رنز بناسکے، انہیں بھی رتنائیکے نے پولین واپس بھیجا،بابر اعظم 37 اور عثمان خان 3 رنز پر ناٹ آؤٹ رہے، یوں پاکستان نے سری لنکا کو 6 وکٹوں سے ہراکر ٹرائی نیشن سیریز اپنے نام کرلی۔

https://https://x.com/TheRealPCB/status/1994823604467614183?t=fk07udiKsk_IkbeveeU0vQ&s=19

محمد نواز کو پلیئر آف دی میچ اور پلیئر آف دی سیریز قرار دیا گیا، انہوں نے فائنل میں 4 اوورز میں 17 رنز دے کر 3 وکٹیں حاصل کیں اور ٹیم کی جیت میں اہم کردار ادا کیا جبکہ محمد نواز نے سیریز میں مجموعی طور پر 10 وکٹیں حاصل کیں۔

اس سے پہلے پاکستان نے سری لنکا کے خلاف ٹاس جیت کر فیلڈنگ کا فیصلہ کیا۔ پہلے بیٹنگ کرتے ہوئے 84 رنز پر سری لنکا کی صرف ایک وکٹ گری تھی۔اس کے بعد پاکستانی بولرز کی تباہ کن بولنگ کے باعث اسکور میں صرف 30 رنز کے اضافے پر اس کے 9 کھلاڑیوں نے پویلین کی راہ لی۔

کامل مشرا 59 رنز کے ساتھ سری لنکا کے سب سے نمایاں بیٹر رہے، ان کی اننگز میں 4 چھکے اور 2 چوکے شامل تھے۔ اس طرح سری لنکا کی ٹیم 114 رنز بناکر آؤٹ ہوگئی۔

شاہین آفریدی اور محمد نواز نے تین، تین وکٹیں حاصل کیں، جبکہ ابرار احمد نے دو کھلاڑیوں کو آؤٹ کیا، سلمان مرزا اور صائم ایوب کے حصے میں ایک، ایک وکٹ آئی۔

فائنل کیلئے پاکستانی ٹیم میں ایک تبدیلی کی گئی ہے، فاسٹ بولر شاہین آفریدی پلیئنگ الیون میں واپس ہوئی ہے جبکہ وسیم جونیئر کو ڈراپ کردیا گیا۔سری لنکن ٹیم میں کوئی تبدیلی نہیں کی گئی، وہی ٹیم برقرار رکھی گئی ہے جس نے آخری میچ میں پاکستان کیخلاف کامیابی حاصل کی تھی۔

پاکستان کرکٹ ٹیم کے کپتان سلمان علی آغا نےٹاس کے موقع پرکہا کہ پچ عام پنڈی وکٹ جیسی نہیں، مگر پھر بھی 160 سے 170 رنز کا ٹوٹل قابلِ دفاع ہوگا۔ ان کے مطابق ٹیم کو صرف معیاری کرکٹ کھیلنے کی ضرورت ہے۔

سری لنکن کپتان داسن شاناکا نے کہا کہ سرد موسم کوئی مسئلہ نہیں اور ٹیم ایسے حالات کی عادی ہے۔ انہوں نے کہا کہ اگر بیٹنگ میں 160 سے زائد اسکور مل جائے تو وہ اسے بونس سمجھیں گے، سری لنکا نے اپنی ٹیم میں کوئی تبدیلی نہیں کی۔

سری لنکا نے پہلے زمبابوے اور آخری میچ میں پاکستان کو شکست دیکر فائنل میں جگہ بنائی تھی تاہم زمبابوے کی ٹیم اچھا کھیلنے کے باوجود فائنل تک رسائی حاصل نہیں کر سکی.