پاکستان بھارت سے شکست کے بعد چیمپئنز ٹرافی کی دوڑسے آوٹ ہوگیا

فوٹو : سوشل میڈیا

دبئی : آئی سی سی چیمپئنز ٹرافی کا پانچواں میچ، پاکستان بھارت سے شکست کے بعد چیمپئنز ٹرافی کی دوڑسے آوٹ ہوگیا، بھارت نے پاکستان کو 6 وکٹوں سے شکست دے دی، کوہلی نے ناقابل شکست سنچری سکور کی.

دبئی میں کھیلے گئے میچ میں پاکستانی ٹیم نے ٹاس جیت کر پہلے بیٹنگ کا فیصلہ کیا اور پوری ٹیم 241 رنز پر آؤٹ ہوگئی اور بھارت کو جیت کیلئے 242 رنز کا ہدف دیا۔

بھارت نےہدف کے تعاقب میں ویرات کوہلی کی زبردست بیٹنگ کی بدولت 42 اعشاریہ 3 اوورز میں ہدف حاصل کرلیا، ویرات کوہلی نے نہ صرف ون ڈے کرکٹ میں 14 ہزار رنز مکمل کیے بلکہ اپنی 51 ویں سنچری بھی بنائی۔

بھارتی اننگز کا جارحانہ آغاز کپتان روہت شرما اور شبمن گل نے کیا اور 4 اوورز میں ہی ٹیم کا اسکور 31 رنز تک پہنچا دیا، روہت شرما شاہین آفریدی کی یارکر پرکلیئن بولڈ ہوگئے، انہوں نے 15 گیندوں پر 1 چھکے اور 3 چوکوں کی مدد سے 20 رنز بنائے۔

دوسری وکٹ ابرار احمد نے شبمن گل کو چلتا کیا، شبمن گل کی حاصل کی، وہ 100 کے مجموعے پر بھارت کے دوسرے آؤٹ ہونے والے کھلاڑی تھے۔اس کے بعد ویرات کوہلی کا ساتھ دینے کیلئے شیریاس ایئر آئے اور دونوں نے 114 رنز کی شاندار شراکت کی.

اسکور 214 رنز تک پہنچا دیا، بھارت کے تیسرے آؤٹ ہونے والے کھلاڑی شریاس تھے جو 56 رنز بناکر خوشدل شاہ کی گیند پر امام الحق کے ہاتھوں کیچ آؤٹ ہوئے۔

اس کے کچھ ہی دیر بعد ہاردک پانڈیا بھی 223 کے مجموعے پر شاہین شاہ آفریدی کی گیند پر وکٹ کیپر کو کیچ دے کر آؤٹ ہوگئے۔میچ کے آخری لمحات میں ویرات کوہلی نے سنچری مکمل کی۔

بھارتی بیٹر نے خوشدل کی گیند پر ایک زبردست شارٹ کھیلتے ہوئے چوکا مار کر اپنی سنچری مکمل کرتے ہوئے بھارت کو اہم میچ میں فتح دلا دی. ویرات کوہلی نے 111 گیندوں پر ناقابل شکست 100 رنز بنائے اور مین آف دی میچ کا ایوارڈ اپنے نام کیا۔

اس سے قبل پاکستان نے بھارت کے خلاف ٹاس جیت کر پہلے بیٹنگ کرنے کا فیصلہ کیا تھا، پاکستان کی جانب سے بابر اعظم اور امام الحق نے اننگز کا آغاز کیا جبکہ بھارت کی جانب سے فاسٹ بولر محمد شامی نے پہلا اوور کروایا۔

پاکستانی اوپنرز نے ذمے داری اور محتاط طریقے سے اننگ کا آغاز کیا اور 6 اوورز میں ٹیم کا اسکور 26 رنز تک پہنچایا۔بابر اعظم 26 گیندوں پر 23 رنز بنا کر وکٹ کے پیچھے کیچ آؤٹ ہوئے جبکہ امام الحق 10 رنز بنا کر رن آؤٹ ہوکر پویلین واپس لوٹے۔

پاکستان کی پہلی وکٹ 8.2 اوورز میں41 رنز پر جبکہ دوسری وکٹ 47 رنز پر گر ی۔
جس کے بعد کپتان محمد رضوان اور سعود شکیل نے 104 رنز کی شراکت قائم کی، پاکستان کے تیسرے آؤٹ ہونے والے کھلاڑی کپتان محمد رضوان تھے جو 46 رنز بنا کر اکشر پٹیل کی گیند پر بولڈ ہوگئے۔

ان کی وکٹ کے فوراً بعد ہی پاکستانی بیٹنگ لائن ایک مرتبہ پھر مشکلات کا شکار ہوگئی۔ پہلے سعود شکیل کا کیچ ڈراپ ہوا لیکن کچھ ہی دیر بعد وہ بھی 76 گیندوں پر 5 چوکوں کی مدد سے 62 رنز بنا کر آؤٹ ہوئے، یوں پاکستان کو چوتھا نقصان 159 کے مجموعے پر سعود شکیل کی صورت میں اٹھانا پڑا۔

پاکستان کے پانچویں آؤٹ ہونے والے کھلاڑی طیب طاہر تھے، وہ 165 کے اسکور پر 6 گیندوں پر 4 رنز بنا کر آؤٹ ہوئے۔ اس کے بعد 200 کے مجموعے پر پاکستان کے چھٹے کھلاڑی سلمان آغا 19 رنز بناکر آؤٹ ہوئے جبکہ اسی اسکور پر شاہین آفریدی بھی ایل بی ڈبلیو ہوگئے.

خوشدل شاہ نے رنز بنانے کا سلسلہ جاری رکھا، انکے ساتھ پہلے نسیم شاہ نے 14 رنز بنا کر ساتھ دیا پھر حارث رؤف نے 8 رنز کے ساتھ اسکور کو آگے بڑھانے میں مدد کی۔

قومی ٹیم کے آخری آؤٹ ہونے والے کھلاڑی خوشدل شاہ تھے جنہوں نے 39 گیندوں پر 38 رنز کی اننگز کھیلی۔ بھارت کی جانب سے کلدیپ یادیو نے 3، ہاردیک پانڈیا نے 2 جبکہ ہرشت رانا، اکشر پٹیل اور ویندرا جاڈیجا نے ایک ایک وکٹ لی۔

اس سے قبل دبئی میں ٹاس کے بعد گفتگو کرتے ہوئے پاکستان کرکٹ ٹیم کے کپتان محمد رضوان نے کہا تھا کہ ہماری ٹیم آج کے میچ میں اچھی کارکردگی دکھائے گی۔

محمد رضوان نے کہا تھا کہ آج کے میچ کے لیے ٹیم میں ایک تبدیلی کی ہے، فخر زمان کی جگہ امام الحق ٹیم میں شامل ہیں۔

انہوں نے کہا کہ ہمارے کھلاڑی یہاں کی کنڈیشنز سے ہم آہنگ ہیں، آئی سی سی ٹورنامنٹ کا ہر میچ اہم ہوتا ہے، پِچ آج سلو ہوسکتی ہے، شام میں اوس پڑنے کا امکان کم ہے۔

بھارتی کپتان روہت شرما نے کہا تھا کہ ہم ٹاس جیت جاتے تو بولنگ کرتے، پاکستان کے ٹاس جیتنے سے ہمیں کوئی فرق نہیں پڑتا، آج کی پِچ بھی پچھلے میچ ہی جیسی ہے۔

روہت شرما نے کہا کہ ہمارے پاس تجربہ کار بیٹرز موجود ہیں، ٹیم میں کوئی تبدیلی نہیں کی ہے، آج کے میچ میں تمام کھلاڑیوں کا پرفارم کرنا ضروری ہے۔

پاکستان ٹیم
بھارت کا مقابلہ کرنے کے لیے آج بابر اعظم، امام الحق، سعود شکیل، محمد رضوان، آغا سلمان، طیب طاہر، خوشدل شاہ، ابرار احمد ، نسیم شاہ، شاہین آفریدی اور حارث رؤف میدان میں اترے۔

بھارتی ٹیم
آج کے میچ کے لیے روہت شرما، شُبمن گل، ویرات کوہلی، شریاس ایئر، اکشر پٹیل، کے ایل راہول، ہاردک پانڈیا، رویندرا جڈیجا، حرشت رانا، محمد شامی اور کلدیپ یادو ٹیم کا حصہ تھے۔