پاکستان اور افغانستان حالیہ کشیدگی بات چیت کے زریعے حل کریں، حالات بگڑنے سے بچیں، چین

فوٹو : فائل

بیجنگ: چین نے پاکستان اور افغانستان پر زور دیا ہے کہ وہ حالیہ کشیدگی کو بات چیت اور مشاورت کے ذریعے کم کریں اور صورتحال کو مزید بگڑنے سے بچائیں۔ چینی وزارتِ خارجہ کے ترجمان گو جیاؤکن نے بیجنگ میں پریس بریفنگ کے دوران کہا کہ چین دونوں ممالک کے درمیان تناؤ پر گہری نظر رکھے ہوئے ہے اور امید کرتا ہے کہ تمام اختلافات سفارتی طریقے سے حل کیے جائیں گے۔

ترجمان نے کہا کہ پاکستان اور افغانستان چین کے روایتی اور قریبی دوست ملک ہیں اور بیجنگ چاہتا ہے کہ خطے میں امن و استحکام ہر صورت برقرار رہے۔

انہوں نے اس بات پر زور دیا کہ دونوں ممالک فوری طور پر صورتحال میں نرمی لائیں، غلط فہمیوں کو مذاکرات کے ذریعے دور کریں اور سرحدی ماحول کو بہتر بنانے کے لیے مثبت اقدامات کریں۔

حالیہ دنوں میں پاک-افغان سرحد پر جھڑپوں کے بعد پیدا ہونے والی کشیدگی پر چین نے تشویش کا اظہار کرتے ہوئے کہا ہے کہ سرحدی امن خطے کی سلامتی اور اقتصادی تعاون کے لیے بنیادی اہمیت رکھتا ہے۔

چینی ترجمان کے مطابق چین بین الاقوامی برادری کے ساتھ مل کر دونوں ممالک کے درمیان اعتماد سازی اور روابط کے فروغ کے لیے اپنا کردار ادا کرنے کو تیار ہے، تاکہ خطے میں دیرپا امن اور مشترکہ ترقی کا راستہ ہموار ہو سکے۔

پاکستان اور افغانستان حالیہ کشیدگی بات چیت کے زریعے حل کریں، حالات بگڑنے سے بچیں، چین