فوٹو : فائل
اسلام آباد : وزیراعظم شہباز شریف اپنے 39 ویں غیر ملکی دورے میں آسٹریا روانہ ہوگئے،آسٹریا کے چانسلر کرسچئن اسٹاکر کی دعوت پر آج وزیرِ اعظم محمد شہباز شریف دو روزہ سرکاری دورے پر ویانا، آسٹریا روانہ ہو ئے۔
نائب وزیرِ اعظم و وزیرِ خارجہ محمد اسحاق ڈار، وفاقی وزیرِ اطلاعات و نشریات عطاء اللہ تارڑ اور معاونِ خصوصی طارق فاطمی بھی وزیرِ اعظم کے ہمراہ وفد میں شامل ہیں۔
وزیرِ اعظم ویانا میں فیڈرل چانسلری میں آسٹریا کے چانسلر سے دو طرفہ اور وفود کی سطح پر ملاقات کریں گے۔ وزیرِ اعظم اور آسٹرین چانسلر دونوں ممالک کے مابین سرمایہ کاری میں اضافے کے لیے معروف کاروباری افراد کے اجلاس کی مشترکہ صدارت کریں گے۔
وزیرِ اعظم پاکستان آسٹریا بزنس فورم میں شرکت اور خطاب کریں گے۔ وزیرِ اعظم ویانا میں اقوام متحدہ کے تحت منعقدہ “پائیدار ترقی، عالمی امن و خوشحالی کا راستہ” کے موضوع پر خصوصی تقریب میں بھی شرکت اور خطاب کریں گے۔
وزیرِ اعظم انٹرنیشنل اٹامک انرجی ایجنسی کے ڈائریکٹر جنرل سے بھی ملاقات کریں گے۔
وزیرِ اعظم کا آسٹریا کا سرکاری دورہ دونوں ممالک کے مابین دو طرفہ تعلقات میں نئی جہتوں کا اضافہ کرے گا۔
ذرائع کے مطابق وزیراعظم شہباز شریف نے اپنے موجودہ دور حکومت میں مارچ 2024 کے 38 غیرملکی دورے کئے ہیں، یہ دورے 17 ممالک کے ہیں جس میں آسٹریا کا شامل کر لیا جائے تو یہ تعداد 39 ہو جائے گی.
وزیراعظم شہباز شریف نے سب سے زیادہ سعودی عرب کے9 دورے کئے ہیں اس کے علاوہ آذربائیجان، 5، متحدہ عرب امارات، 3، دیگر ممالک چین، امریکا، مصر، قطرکے دورے کئے جن میں بعض نجی دورے شامل ہیں.
Comments are closed.