دھرنا،عمران خان کی بہنوں، سلمان اکرم راجہ،400 افراد کیخلاف دہشتگردی کا مقدمہ درج

فوٹو : سوشل میڈیا

راولپنڈی : راولپنڈی میں اڈیالہ جیل کے باہر دھرنا،عمران خان کی بہنوں، سلمان اکرم راجہ،400 افراد کیخلاف دہشتگردی کا مقدمہ درج، تھانہ صدربیرونی میں انچارج اڈیالہ پولیس چوکی سب انسپکٹر محمد عمران خان کی مدعیت میں درج کی گئی۔

ایف آئی آر میں سابق وزیر اعظم پاکستان عمران خان کی تینوں بہنوں علیمہ خان، ڈاکٹر عظمیٰ خان اور نورین خان نیازی کے علاوہ سلمان اکرم راجہ، عالیہ حمزہ، راجہ ناصر عباس نقوی ، نعیم پنجوتھا، تابش فاروق، طیبہ راجہ، شوکت بسرا، نادیہ خٹک اور راجہ اسد عباس کو بھی نامزد کیا گیا ہے.

ایف آئی آر میں 35 نامزد ملزمان،آئی ایس ایف عہدیداروں سمیت تین چار سو دیگر ملزمان شامل ہیں،اڈیالہ جیل کے باہر دھرنے کے معاملے پر عمران خان کی بہنوں،پی ٹی آئی رہنماؤں سمیت 400 افراد کیخلاف دہشت گردی و دیگر دفعات لگائی گئی ہیں.

ملزمان نےپولیس کی جانب پٹرول بم پھینکے

ایف آئی آرکے متن کے مطابق ملزمان نےپولیس کی جانب پٹرول بم پھینکے،حکومت پاکستان اور اداروں کیخلاف نعرہ بازی کی، اہل علاقہ کی جان ومال کو خطرہ میں ڈالا گیا. 

گزشتہ رات اڈیالہ جیل کے باہر پی ٹی آئی مظاہرین کیخلاف واٹر کینن کا استعمال کیا گیا تھا اور پی ٹی آئی کی جانب سے الزام لگایا گیا تھا کہ ان پر کیمیکل ملا پانی پھینکا گیا، جسمانی تشدد کیا گیا اور متعدد کارکنوں کو زبردستی گرفتار کرلیاگیا۔

پولیس نے 14 ملزموں کو موقع سے گرفتار کر لیا تھا، ایف آئی آر میں انسداد دہشت گردی ایکٹ کی دفعہ 7،دفعہ 21-1،اقدام قتل کی دفعہ 324، ریاست پر حملے کی مجرمانہ سازش کی منصوبہ بندی کی دفعہ120 بی، کار سرکار میں مزاحمت کی دفعہ، اعانت مجرمانہ، خلاف قانون مجمع کی دفعات شامل ہیں.

اس کے علاوہ دفعہ 144 کی خلاف ورزی کی دفعہ اور سرکاری املاک کو نقصان پہنچانا بھی شامل ہے، تھانہ صدربیرونی میں درج ایف آئی آر میں ظفر گوندل، شفقت عباس، طارق ساہی ،عثمان جوڑا سمیت 35افراد کو نامزد کو بھی نامزد کیا گیا ہے.