بھارت نے انڈر 19 ایشیا کپ میں پاکستان کو 90 رنز سے ہرادیا

فوٹو : سوشل میڈیا

دبئی : بھارت نے انڈر 19 ایشیا کپ میں پاکستان کو 90 رنز سے ہرادیا۔ بھارتی ٹیم نے پہلے کھیلتے ہوئے 240 رنز بنائے، جواب میں پاکستانی ٹیم 150 رنز پر آوٹ ہوگئی حزیفہ حسن کے علاوہ کوئی پاکستانی بیٹرکریز پر نہ جم سکا۔

دبئی کےآئی سی سی کرکٹ اکیڈمی میں ایونٹ کے پانچویں میچ میں بارش کے باعث ٹاس ایک گھنٹے تاخیر سے ہوا، جس کے بعد میچ 49 اوورز فی اننگز تک محدود کردیا گیا۔ میچ سے قبل دونوں ٹیموں کے کپتانوں نے ایک دوسرے سے مصافحہ نہیں کیا۔

پاکستان نے ٹاس جیت کر پہلے فیلڈنگ کا فیصلہ کیا۔ پاکستان کے خلاف بھارتی ٹیم 240 رنز بنا کر آؤٹ ہو گئی اور قومی ٹیم کو فتح کے لیے 241 رنز کا ہدف ملا۔

بھارتی ٹیم نے مقررہ 49 اوورز میں 10 وکٹوں کے نقصان پر 240 رنز بنائے۔ آیوش مہاترے 38، ویبھو سوریاونشی 5، ویہان ملہوترا 12 اور ویڈانت ترویدی 7 رنز بنا کر آؤٹ ہوئے۔ ابھیگیان کنڈو نے 22، آرون جارج نے 85، کھیلان پٹیل نے 6، کنشک چوہان نے 46 جبکہ ہینل پٹیل نے 12 رنز اسکور کیے۔

پاکستان کی جانب سے محمد صیام اور عبدالسبحان نے شاندار بولنگ کا مظاہرہ کرتے ہوئے 3، 3 وکٹیں حاصل کیں، جبکہ نقاب شفیق نے 2 کھلاڑیوں کو آؤٹ کیا۔

 ہدف کے تعاقب میں پاکستانی ٹیم نے محتاط آغاز کیا جس کی وجہ سے ٹیم پر دباو بڑھ گیا، 21ویں اوور کی پہلی گیند پر اوپنر سمیر منہاس اپنی وکٹ کھو بیٹھے۔ جس کے بعد محض 30 رنز پر 4 کھلاڑی پویلین لوٹ گئے۔

حذیفہ حسن 70، فرحان یوسف 23 اور عثمان خان 16 رنز بنا کر آؤٹ ہوئے۔ ان کے علاوہ کوئی پاکستانی کھلاڑی ڈبل فیگر میں داخل نہ ہوسکا اور پوری ٹیم 42ویں اوورز میں 150 رنز پر آؤٹ ہوگئی۔

بھارت کی جانب سے دپیش دیوندرن کنیشک چوہان نے 3،3 وکٹیں حاصل کیں۔ کشن سنگھ نے 2 جبکہ کِھلن پٹیل اور وبھیوا سویاونشی نے 1،1 کھلاڑی کو آؤٹ کیا۔

واضح رہے کہ دونوں ٹیموں نے ایونٹ میں افتتاحی میچز میں بڑی فتوحات سمیٹی ہیں۔ پاکستان نے ملائیشیا کو 297 رنز جبکہ انڈیا نے یو اے ای کو 234 رنز سے شکست دی تھی۔