نوازشریف کی جائیداد نیلام ،8اکاؤنٹس کی رقم سرکارکو منتقلی کا حکم


اسلام آباد: سابق وزیراعظم نوازشریف کی احتساب عدالت نے جائیداد نیلام کرنے کاحکم دے دیاہے، عدالت نے ڈپٹی کمشنر لاہور اور شیخو پورہ کو 60 روز کے اندر رپورٹ پیش کرنے کی ہدایت کردی۔

نواز شریف کی جائیداد نیلامی کیلئے دائر درخواست نیب راولپنڈی کی جانب سے دائر کی گئی تھی جسے احتساب عدالت نے منظور کر لیا عدالت کے فیصلے کے مطابق نواز شریف کی جہاں جہاں جائیداد ہے، متعلقہ صوبائی حکومت اُسے نیلام کرسکے گی۔

عدالتی فیصلے میں ڈی سی لاہور اور ڈی سی شیخوپورہ کو نواز شریف کی اراضی فروخت کرنے کا حکم دیتے ہوئے کہا گیا ہے کہ 60 روز کے اندر رپورٹ پیش کریں، جائیدادیں نیلام کرکے رقم قومی خزانے میں جمع کرائی جائے۔

عدالت نے کہا کہ نوازشریف کی گاڑیاں پولیس کی مدد سے قبضے میں لے کر 30 دن کے اندر نیلام کی جائیں ، فیصلے میں ای ٹی او لاہور اور اسلام آباد کو نواز شریف کی 3 گاڑیاں اور 2 ٹریکٹر بھی فروخت کرنے کا حکم دیا گیا۔

نواز شریف کے 8 بینک اکاونٹس سے رقوم سرکاری خزانے میں منتقل کرنے کا بھی حکم دیا گیا، چیئرمین ایس ایس سی پی کو نواز شریف کے 4 کمپنیوں میں شیئرز فروخت کرنے کی ہدایت کی گئی ہے، ۔

شیئرز کی فروخت سے حاصل رقم بھی قومی خزانے میں جمع کرانے کی ہدایت کی گئی ہے،عدالت نے کہا ہے کہ جس جس جائیداد پر اعتراض نہیں آیا نیلام کی جا سکے گی، مری اور چھانگہ گلی کے گھر کی ضبطگی پر مریم نواز نے اعتراض کر رکھا ہے۔

توشہ خانہ ریفرنس میں نوازشریف کی جائیداد نیلامی کے معاملے پر نیب پراسیکیوٹر سردار مظفر عباسی نے احتساب عدالت نمبر3 میں درخواست دائر کی تھی، 2 صفحات پر مشتمل درخواست میں جائیداد کی تفصیل بھی شامل تھی۔

نیب کی درخواست میں کہا گیا تھا کہ متعلقہ حکام کوضبط شدہ جائیدادیں نیلام کرنیکی ہدایت کی جائے، نیب کادرخواست میں موقف تھا کہ نوازشریف نیجان بوجھ کر سرنڈر نہیں کیا ہے۔

نیب کی تیار کردہ رپورٹ میں بتایا گیا تھا کہ ایس ای سی پی کے مطابق نواز شریف کے4 کمپنیوں میں شیئر ہیں، محمد بخش ٹیکسٹائل ملز میں نواز شریف کے 4 لاکھ 67 ہزار 950 شیئرز ہیں۔

رپورٹ میں کہا گیا ہے کہ حدیبیہ پیپر ملز میں نواز شریف 3 لاکھ 43 ہزار 425 شیئر کے مالک ہیں جبکہ حدیبیہ انجینئرنگ کمپنی میں نواز شریف کے شیئر کی تعداد 22 ہزار 213 ہے۔

مری میں بنگلہ، چھانگلہ گلی ایبٹ آباد میں 15 کنال کا مکان اور اپر مال لاہور پر جائیداد شامل ہے، نواز شریف اوران کے زیر کفالت افراد کے نام 1752 کنال سے زائد زرعی اراضی شامل ہے ۔اتفاق ٹیکسٹائل ملز میں نواز شریف 48ہزار 606 شیئر کے مالک ہیں۔

نیب رپورٹ میں بتایا گیا ہے کہ نوازشریف کے مختلف نجی بینکس میں 3 غیر ملکی کرنسی سمیت 8 اکاونٹس شامل ہیں، 5 بینک اکاونٹس میں 6 لاکھ 12 ہزار روپے موجود ہیں، جبکہ غیر ملکی کرنسی والے اکاونٹس میں 566 یورو، 698 امریکی ڈالر اور 498 برطانوی پاونڈ ہیں۔

نیب نے بتایا کہ ایل ڈی اے ، لاہور،شیخو پورہ کے ایڈیشنل ڈپٹی کمشنرز اور مری کے اسسٹنٹ کمشنر اورگلیات ڈویلپمنٹ اتھارٹی نے رپورٹ دی ہے کہ نواز شریف اوران کے زیر کفالت افراد کے نام لاہور، شیخوپورہ، مری، ایبٹ آبادمیں جائیدادیں ہیں۔

لاہور کے موضع مانک میں 936 کنال، موضع بڈوکسانی میں 299 کنال زرعی اراضی ، لاہور کے موضع مال رائے ونڈ میں 103کنال، موضع سلطان میں 312 کنال اراضی شامل ہے۔

متذکرہ جائیداد کے علاوہ شیخوپورہ کے موضع منڈیالی میں 14 کنال،موضع فیروز وطن میں 88 کنال اراضی موجود ہے، نواز شریف کی ان اثاثوں کی رپورٹ بھی نیب کی طرف سے دی گئی ہے۔

Comments are closed.