اگر ججز یرغمال ہیں تو عوام کو بتائیں تاکہ انہیں آزاد کرایا جائے، وزیراعلیٰ خیبر پختونخوا سہیل آفریدی

فوٹو : فائل

پشاور: وزیراعلیٰ خیبر پختونخوا سہیل آفریدی نے کہا ہے کہ اگر واقعی ججز یرغمال ہیں تو قوم کو آگاہ کیا جائے تاکہ عوام خود انہیں آزاد کرائیں۔

پشاور میں وزیراعلیٰ ہاؤس میں منعقدہ ایک تقریب سے خطاب کرتے ہوئے، جس میں جسٹس لائرز فورم کے 94 وکلاء نے انصاف لائرز فورم میں شمولیت اختیار کی۔

سہیل آفریدی نے کہا کہ میری عمران خان سے ملاقات کرانے کے عدالتی احکامات کو ردی کی ٹوکری میں پھینک دیا گیا۔

انہوں نے کہا کہ “میرا سڑک پر بیٹھنا میری کمزوری نہیں بلکہ عدلیہ کی بے بسی کی علامت ہے، جو اپنے ہی فیصلوں پر عمل درآمد نہیں کرا سکتی۔”

وزیراعلیٰ نے کہا کہ ان کی حکومت کا مقصد "ایک ریاست دو دستور” کے نظام کو ختم کرنا ہے، کیونکہ 26ویں آئینی ترمیم نے عدلیہ کو مفلوج کر کے رکھ دیا ہے۔

انہوں نے کہا کہ ہماری جدوجہد کا مقصد حقیقی آزادی، آئین و قانون کی بالادستی اور میڈیا کی آزادی ہے، اور اس جدوجہد میں وکلاء برادری کا کردار بنیادی حیثیت رکھتا ہے۔

سہیل آفریدی نے مزید بتایا کہ صوبے کی بار ایسوسی ایشنز کے لیے 42 کروڑ روپے کی گرانٹس منظور ہوچکی ہیں جو چند دنوں میں جاری کر دی جائیں گی۔

ان کا کہنا تھا کہ “ہم آئین و قانون کو مکڑی کا جالا نہیں بننے دیں گے، جس میں کمزور پھنس جائے اور طاقتور نکل جائے۔ آئین سب کے لیے برابر ہے، اور ہم طاقتوروں کو بھی انصاف کے کٹہرے میں لانے کا عزم رکھتے ہیں۔”

اگر ججز یرغمال ہیں تو عوام کو بتائیں تاکہ انہیں آزاد کرایا جائے، وزیراعلیٰ خیبر پختونخوا سہیل آفریدی